Luy jot jot na, ginnaaw dee

Kuy woddoo làmmiñ, soo noppee rafle

Wuude, lu mu wax ci feebaru béy, der baa ko waral

Xaalis du faj dee, gàcce lay faj

Ku jàppul ci yatu getax, doo am yatu kel

Yàlla bindul ku dul dee waaye bind na ku dul torox

Làmmiñ du tànk waaye dina tarxiis, gémmiñ du furno waaye dina boy

Nag wu ñuul ku ci am meew mu weex war a sànt

Alal na mag boroom, ndax su ñu maasee ñoom ñaar yéwén ci day daldi jafe

Ndimbal na ca fekk loxol boroom

Kër baay du kër

Su bën dee seeñu yax, suux saa tax

Bala ngaa xam xamadi xaw la rey

Wax dëgg du wàññi wërsëg

Doxkat du fekke dëju maamam

Njëriñ loo fekke

Jaam ak pexeem, Yàllaak dogalam

Ay du weesu baay dee na

Lu jot yomb

Kiy liggéey mooy yàq

Politig, ci àddina la yem, kenn du ko yóbbuwaale àllaaxira

Ñaari loxooy tàccu

Nettali ci gémmiñu boroom la dàqe

Koo mënul muñ li mu làq doo ko sañ a wax dëgg

Su mbote bootoo ci gaynde tey ree, ñàkk ku ko yedd a tax

Daw ca ba ngay am i tànk

Ñaari tànk ay dox mbokk

Ku la yéene xiif, saa yoo ko rombee géexal

Alal ganug dof la, buy ñëw du tàggoo, buy dem du tàggoo

Ku la mag ëpp la ay sagar

Ku bëgg sa taar moo la naan sangul

Liggéeyu ndey, añu doom

Soo bërewulee ñu bëre daanu sa kow

Fu fas dul dem, xel a fay doxantu

Dof boo gis, ay nit a nga ca kër ga mu jóge

La muy saf ka ko macc a ko xam

Kuy yoot du sëqat

Ba la ngaa pes sàmm bi xaaral ba xam lu muy wëliis

Kenn du jënd jaan ci pax

Lu feeñ ci séy, nuyoo na ca ndoxaan la, xanaa kay dañu koo feyul woon rekk

Alalu golo ca lex ba

Ku ne ‘wëy’* tey jii, dinga ne ‘wóoy’ ëllëg – Séex Anta Jóob –
*wëy mooy ‘oui’ ci nasaraan. Mooy jamono ja Se?oor nee ñu woteel ko,
te Séex Anta di artu waa Senegaal, naan leen ku defal Se?oor li mu
bëgg dinga ko réccuji ëllëg.

Waññi boo gis ci benn lay doore

Ay du yem ci boppu boroom

Lu kenn mën, ñaar a la ko dàq. Ba mu des lan ? Xanaa… wéet !

Bëgg naa la, bëgguma la, loolu jarul coow – Njaga Mbay, woykat –

Mbeju kanam boroom a koy fajal boppam

Montar yu baax yépp a bokk waxtu

Bóli gu dog tiiñ na doktoor

Ku jaan mátt sam xel dem ci dee, ba ngay dund ak ba ngay dee yépp sam xel dem ci dee

Saabu du fóot boppam

Dërëm ak dërëm ñoo mën a ànd

Tere-tere mu të, bàyyil mu gis

Yágg dox, yágg gis

Mbamb du weesu weer

Ku muñ, muuñ

Ku mënul bawoo, lu yáqu yowa

Ku mën te defoo, lu yáqu yowa

Waa dëkk bee xam lu ndoxu teen biy saf

Ñaq du feeñ ci taw bi

Werante xuuxaan tekki tubéy

Xuloo sën la, lu waay jot sánni sa moroom

Naar ba noon na : bés bu ma amee, képp ku ma xamoon ba ma ñàkkee, yal na nga dee