|
|
|
Kocc Barma
Fall, ku
ko xamul it dégg nga ay jàlloreem! Boroom xam-xam
bu mag
lawoon fii ci Kajoor, ci réewum Senegaal gii téy.
Jàpp nanu ne Kocc mu ngi doon dund ci fukk-ak-juroom-bennulu
xarnu bi weesu (1584 - 1654).
Moom Kocc moo doon laamanu dëkk
bu ñu
naan Jàmmatil.
Jamonooy Kocc mu ngi dajewoon nag bu Buur bu tuddoon Daaw Demba. Daaw
Demba mook Kocc ñoo
duggandowoon neegu-góor, nga xam ne kon ñoom ñaar
dañoo
xamantewoon bu baaxa baax!
Daaw Demba moomu nag, buur bu soxar lawoon, ñakkoon
teggin lool te gaawoon ci toroxal askan wi.
Looloo taxoon Kocc doon ko xeex. Di ko xeex guddi ak
bëccëg,
te jëlul fetal, jëlul
jaasi: ci ñawaayu
xelam donn la ko
doon xeexe. Ba mujj daan ko jél bu set wecc bu kenn dootul
miim! Waa Kajoor fippu, dajaloo
folli Daw Demba, gennee ko réew ma!
Kon Kocc lees mena jàng ci moom ci jikko, ci xam-xam, ci
yeewute bari na te du jeex ba fàww!
Rawatina téy jii nga xam ne nguur yi ëpp
ci Afrik parlparloo, nooteel akub cuune rekk leeni mandargaal.
Kocc Barma daal ku mata ormaal, ku
mata fonk la, ku mata fàtalli ak yeesalaat ay mbiram la. Ay
diggléem aki xalaatam téy jii la seen maanaa gëna
jéggi dáyyoo.
|
|
